Protesta e banorëve të Astirit vazhdon përsëri, mirëpo këtë herë thirrjet kanë pasur karakter tërësisht tjetër.
Përpos faktit që janë duke kërkuar nga kryeministri Rama dhe kryebashkiaku Veliaj, anulimin e projektit, ata kanë drejtuar edhe thirrje të tilla si “do të bëhemi viktima ose do të bëjmë viktima”.
Ata kanë thënë se nëse nuk ndodh që projekti të anulohet, protesta do të vazhdojnë me të njëjtin intensitet si gjithë këto muaj deri në rrëzimin nga pushteti të “qeverisë kriminale”.
“Ne nuk tërhiqemi, do t’i mbrojmë pronat tona që janë mundi i 25 viteve. Erion Veliaj po jep me koncesion tokën pranë Policisë Bashkiake sic bëri me Teatrin, por qytetarët nuk do ta lejojnë, ata i kanë ditët e numëruara. Banorët e Unazës së Re do të qëndrojnë këtu dhe do të rezistojmë këtu deri në fund, ose do të bëhemi viktima ose do të bëjmë viktima,” – thanë banorët.
Ata folën edhe për situatën në vend lidhur me vrasjet dhe grabitjet që kanë ndodhur ditët e fundit.
“Situata në vend është alarmante ku çdo ditë po bëhen vrasje dhe grabitje në mes të ditës. Duhet ti themi ndal kësaj qeverie kriminale dhe ta rrëzojmë një ditë e më parë.”
