Gjykata e Apelit në Tiranë ka vendosur të shtyjë për ditën e nesërme marrjen e vendimit mbi masat e sigurisë për 10 zyrtarë dhe ish-zyrtarë të arrestuar në lidhje me akuzat për evazion fiskal ndaj kompanisë së naftës “Bankers Petroleum”.
Prokuroria kërkoi arrest me burg për ish-drejtorin Leonidha Çobo, drejtorin aktual Hongping Xiao dhe disa zyrtarë të tjerë, të cilët akuzohen për evazion fiskal, pastrim parash dhe abuzim me detyrën.
Seanca u zhvillua me dyer të mbyllura për shkak të natyrës së ndjeshme të çështjes dhe kërkesës së palëve për ruajtjen e konfidencialitetit.
Përfaqësues të ambasadës kineze në Tiranë, të pranishëm jashtë sallës së gjyqit për të ndjekur procesin, nuk u lejuan të marrin pjesë në seancë, duke u bazuar në ndjeshmërinë e madhe të çështjes.
Sipas prokurorisë, drejtuesit e “Bankers Petroleum” akuzohen se kanë manipuluar shpenzimet e kompanisë duke transferuar fonde në llogari të lidhura dhe përmes kontratave të dyshimta. Kjo praktikë ka shkaktuar humbje të vazhdueshme për kompaninë dhe mospagesë të tatimit mbi fitimin, i cili në sektorin e naftës arrin në 50%.
Që nga themelimi në vitin 2004, kompania ka shitur naftë me vlerë prej 532 miliardë lekësh, por ka deklaruar shpenzime që tejkalojnë këtë shumë, rreth 684 miliardë lekë. Kjo kontradiktë ka ngjallur dyshime tek prokurorët për mënyrat e fshehta që pronarët e panjohur mund të përdorin për të transferuar fitimet jashtë kompanisë.
Ndërkohë, ish-drejtori i përgjithshëm Leonidha Çobo dhe drejtori aktual Hongping Xiao mbeten në qendër të hetimeve, ndërsa katër persona të tjerë janë shpallur në kërkim për përfshirje në këtë skemë.
