14% e shqiptarëve jetojnë në varfëri. Këto shifra janë publikuar nga Banka Botërore dhe konkretisht nga drejtuesi i zyrës së saj në Shqipëri, Emanuel Salinas. Sipas Salinas, i cili zbuloi shifrat e varfërisë në vendin tonë, një pjesë tjetër e konsiderueshme, jeton në kufirin e varfërisë.
‘Gati 14 për qind e popullsisë në Shqipëri jetojnë në varfëri, pra kanë më pak se 5,5 dollarë në ditë për të jetuar’, tha Salinas në Konferencën Ekonomike të Ballkanit Perëndimor që po zhvillohet në Shqipëri. Një pjesë tjetër e konsiderueshme jeton në kufirin e varfërisë. Shqipëria duhet të luftojë varfërinë, pabarazinë duke krijuar vende të mira pune’, shtoi ai.
Por këto janë vetëm shifrat zyrtare të Bankës Botërore. Kujtojmë që një pjesë e konsiderueshme e familjeve shqiptare jetojnë falë remitancave ose parave të sjella nga emigrantët. Nëse nuk do të ishin këto të ardhura, atëherë 14% do të konsiderohej një shifër pozitive, pasi shifrat mund të ishin shumë herë më të larta.
