Një aksident tragjik me balonë ajri ka shkaktuar të paktën tetë viktima në jug të Brazilit, në rajonin e Santa Catarinës. Ngjarja ndodhi mëngjesin e së shtunës në Praia Grande, ku një balonë me ajër të nxehtë ra nga qielli pasi mori flakë në lartësi.
“Jemi të gjithë të tronditur nga aksidenti që përfshiu një balonë me ajër në Praia Grande, këtë të shtunë në mëngjes. Ekipi ynë i shpëtimit është tashmë në vendngjarje… Deri më tani, kemi konfirmuar tetë të vdekur dhe dy të mbijetuar”, deklaroi guvernatori i Santa Catarinës, Jorginho Mello, përmes një postimi në rrjetin social X.
Sipas guvernatorit, operacionet e kërkim-shpëtimit vijojnë, pasi informacionet paraprake tregojnë se në bordin e balonës ndodheshin gjithsej 22 persona. Autoritetet janë në terren dhe po punojnë për të gjetur të mbijetuar të tjerë.
Pamje të publikuara në rrjetet sociale tregojnë momentet kur balona me ajër të nxehtë përfshihet nga flakët ndërsa ndodhej në fluturim. Pak më pas, ajo rrëzohet dhe digjet plotësisht në tokë.
Autoritetet nuk kanë konfirmuar ende shkaqet e incidentit, ndërsa hetimet janë në vazhdim.
