Ditën e sotme, zv.kryeministrja, njëkohësisht ministrja e Infrastrukturës dhe Energjisë, Belinda Balluku, në një takim me përfaqësues të prodhuesve të energjisë elektrike ka folur bursën energjetike.
Duke iu përgjigjur njërit prej biznesmenëve, Balluku tregoi se bursa energjetike do të jetë gati në mars të 2023-shit.
Gjithashtu ajo deklaroi se dalja në tregun e lirë do të jetë e vështirë për kompanitë, por nënvizoi se qeveria nuk do t’i lërë vetëm.
“Bursa energjetike do të jetë gati në mars të 2023-shit. Procedurat janë të gjitha aty, OST-ja ka ecur, është bërë gara, etj., etj. Megjithatë, ka problematika proceduriale që nuk varen nga ne dhe ne mendojmë që deri në fund të marsit 2023, bursa do jetë aktive.
Por nga ana tjetër ju nuk mund të na thoni se po prisni bursën dhe nga ana tjetër që të mos ju lëshojmë në tregun e lirë. Si do të funksionojë bursa në rast se të gjitha kompanitë, të cilat do të jenë klientët potencialë të bursës marrin shërbim në detyrim të shtetit?
Pra, është diçka që nuk funksionon. Nga momenti që bursa do të hyjë në funksion, detyrimisht të gjithë klientët do të dalin në treg të lirë dhe do fillojnë të blejnë. Nuk do të jetë e lehtë dhe do të jetë shumë e vështirë për ju më shumë sesa për shtetin, por ne besojmë se do bëjmë atë që kanë bërë shtetet europiane para nesh.
Fillimi i funksionimit të bursës nuk do të thotë se gjithçka do të ndryshojë, ju do të jeni të pambrojtur, do jeni të ekspozuar se nuk ka se si ndodh kjo. Ne jemi shumë koshientë se çfarë sjell liberalizimi i tregut dhe këtë mund ta thonë edhe ata që sot i kemi një pikë diskutimi, që janë të gjitha kompanitë që kanë dalë në treg të lirë me një dëshirë të jashtëzakonshme në 2019-ën”, u shpreh Balluku.
