Balli Kombëtar do të bëjë aleancë me Partinë Socialiste. Sinjalin e ka dhënë kreu i kësaj partie, Adriatik Alimadhi. Në një intervistë televizve, Alimadhi është shprehur se është i gatshëm të bëjë pakt edhe me Partinë Socialiste për të mirën e Shqipërisë.
“Kam dashur të jap një sinjal politik se, nëse politika do të mbajë Ballin Kombëtar, jam i gatshëm të bëj bashkëpunim për të mirën e qytetarëve dhe me djallin. Edhe me të djathtën. Nëse duhet për të mirën e Shqipërisë mund ta bëj këtë bashkëpunim dhe me të majtën. Nëse Edi Rama na ndjek i them se jam gati ta bëj këtë”, tha Alimadhi.
Opozita, sipas Alimadhit, ka lëvizur nga e djathta.
“PD ka bërë gabim. Duhet të kishte bërë kujdes në përzgjedhjen e elementëve. E djathta është goditur nga elementë të caktuar. PD ka larguar pak të djathtën dhe është afruar në qendër. Opozita e atëhershme që doli përballë komunizmit, mendoj se nuk janë trajtuar si duhet, por ne do të ishim një zë në PD, ndoshta për të dhënë dhe ide. Shqipërisë i mungon një alternativë e duhur kombëtare”, deklaroi deputeti.
Alimadhi ka folur edhe për Kodi Zgjedhor, duke kundërshtuar ndryshimet e bëra.
“Jam kundër ndryshimeve në Kod Zgjedhor. Lëvizjet në sistem se dëmtojnë Ballin Kombëtar. Për ndryshimet në Kushtetutë unë kam votuar kundër. Nuk shkon kjo pyetje sepse s’më lidh asgjë me të majtën, kam dashur disa herë të jap sinjale për këtë politikë. Mund të dija të shkoja dhe në një subjekt tjetër, por kam zgjedhur të vazhdoj traditën e të parëve të mi. S’kam zgjedhur të shitem se po të ishte kështu do e kisha bërë mirë e bukur”, deklaroi ndër të tjera Alimadhi.
Nëse do të ndodhë aleanca e PS-së me Ballin Kombëtar, kjo do të ishte historike, sepse ndodh për herë të parë që nga prishja e Marrëveshjes së Mukjes në Luftën Nacional Çlirimtare, ku Partia Komuniste u tërhoq nga pakti i bërë. Shenjat e bashkëpunimit me PS-në i kanë dhënë edhe ish- të përndjekurit politik.
/GazetaReforma.com/
