Nënkryetarja e Bashkisë së Tiranës, Anisa Ruseti, ka treguar për “News24”, fatin e fëmijëve të ish-gjyqtares, Fildes Hafizi, e cila u vra nga bashkëshorti.
Ajo thotë se Bashkia e Tiranës u ka gjetur shtëpi fëmijëve dhe iu mbulon qiranë.
Ruseti shprehet më tej, se fëmijët janë shumë të mirë dhe për to kujdeset tezja e tyre.
Ndër të tjera ajo shton se fëmijët kanë mbaruar vitin shkollor dhe janë nën monitorim të vazhdueshëm.
“Rasti që na ka prekur më shumë, por nuk është rasti i vetëm. Detyra jonë është t’i ndjekim të gjitha këto raste. Te ky rast unë jam përfshirë emocionalisht. Fëmijët janë shumë të mbarë, të urtë, të sjellshëm dhe shumë mirë me mësime. Për ta kujdeset tezja e tyre. Jemi në kontakt gjatë gjithë kohës. Kanë mbaruar shkollën dhe unë mezi pres të vazhdojnë vitin tjetër. Ne iu mbulojmë qiranë plotësisht, sepse ata nuk mund të qëndronin në shtëpinë e prindërve të tyre, për shkak të kujtimeve. Ata janë në një shtëpi ngjitur me tezen e tyre. I kemi nën monitorim të vazhdueshëm”, u shpreh Ruseti.
Kujtojmë këtu se gjyqtarja Fildes Hafizi u vra nga bashkëshorti i saj, Fadil Kasemi, brenda në makinë.
Ngjarja solli reagime të shumta të opinionit publik, ndërsa Kasemi u dënua me burgim të përjetshëm.
