Një tjetër incident tronditës i shtohet listës së gjatë të problemeve me të cilat identifikohet kompania ajrore Wizz Air. Ditën e sotme, në Aeroportin Ndërkombëtar “Galileo Galilei” në Pisa, një avion i kësaj linje është ndalur në pistë për shkak të dy gomave të shpuara, duke lënë qindra pasagjerë, mes tyre edhe shqiptarë, të bllokuar për orë të tëra brenda mjetit fluturues.
Pamjet e publikuara nga pasagjerët tregojnë qartë deformimin e gomave të avionit, ndërsa sipas gazetarit italian Alessandro Martini, i cili ndodhej në bord, situata është tensionuar për shkak të mungesës totale të asistencës teknike në aeroport. Sipas tij, autoritetet në Pisa kanë njoftuar se nuk kanë kapacitete për të riparuar defektin dhe se duhet pritur ndihmë teknike nga Roma.
Në orët e kaluara nuk ka pasur asnjë njoftim zyrtar nëse do të dërgohet një avion tjetër për të zëvendësuar mjetin e dëmtuar, duke shtuar pasigurinë dhe frustrimin e pasagjerëve. Kompania Wizz Air, e njohur për heshtjen dhe mungesën e përgjegjësisë në raste të tilla, deri tani nuk ka ofruar asnjë zgjidhje konkrete apo komunikim transparent me udhëtarët.
Ky incident është vetëm një nga shumë rastet që dëshmojnë për standardet alarmante të operimit të Wizz Air. Kompania është kthyer në simbol të abuzimit ndaj pasagjerëve shqiptarë: fluturime të vonuara në mënyrë kronike, bileta të anuluara pa paralajmërim dhe rishitur më shtrenjtë, rritje të kostove të bagazheve, mungesë informacioni dhe trajtim të papranueshëm të qytetarëve.
Vetëm një ditë më parë, një tjetër skandal shpërtheu në fluturimin Bologna-Tiranë ku 13 pasagjerë, mes tyre fëmijë, mbetën jashtë avionit për shkak të overbooking. Stafi i kompanisë u shpreh thjesht: “Nuk kemi çfarë të bëjmë.” Kjo papërgjegjshmëri është kthyer në normë për Wizz Air në Shqipëri, ndërsa institucionet vendase heshtin.
Ndryshe vepron Spanja, e cila ka gjobitur Wizz Air dhe kompani të tjera ajrore për praktika abuzive si tarifimi i bagazheve të dorës dhe mungesa e transparencës, me penalitete që arrijnë deri në 179 milionë euro. Shqipëria, ndërkohë, vijon të qëndrojë duarkryq, duke lënë qytetarët në mëshirë të një kompanie që operon përfitime të mëdha pa respektuar as rregulla, as dinjitet njerëzor.
