Një incident ka ndodhur në Jacksonville në Florida ku një avion Boeing 737 ka përfunduar jashtë pistës dhe është ulur në lumin St.Johns River. Pasagjerët dhe ekuipazhi kanë shpëtuar mrekullisht.
142 persona në bordin e avionit amerikan “Boeing 737” shpëtuan mrekullisht nga një fatkeqësi pasi gjatë zbritjes në aeroportin ushtarak Jacksonville në Florida, avioni doli nga pista dhe ra në lumin St.John. Zjarrfikësit dhe ambulancat kanë shkuar në vend për shpëtimin e pasagjerëve dhe për të shmangur humbjen e karburantit të tepërt në lumë.
Avioni i shoqërisë “Miami Air International” pati vështirësi për shkak të reshjeve të mëdha të shiut teksa ulej në pistë. Për fat, avioni me 136 pasagjerë dhe 6 pjesëtarë të ekuipazhit qëndroi mbi sipërfaqen e ujit.
“Ne ishim në ujë. Ne nuk e kuptuam nëse ishte lumë apo oqean, dhe po vazhdonte të binte shi. Kishte bubullima dhe vetëtima. Në përfundim dikush mbërriti dhe hapi një barkë shpëtimi, ” – tregoi për CNN një pasagjer, avokati Cheryl Bormann.
Incidenti ndodhi rreth orës 21.43 të orës lokale, 3.43 të mëngjesit të së shtunës me orën në Shqipëri. 2 vetë përfunduan në spital me lëndime të lehta.
Avioni, i cili ishte marrë me qira nga Ministria e Mbrojtjes, erdhi nga baza amerikane Guantanamo në Kubë. Nga aeroporti i bazës amerikane në Kubë fluturojnë shumë pak avionë dhe shpesh në bord janë ushtarë dhe familjarë të tyre.
