TIRANË – Struktura e Posaçme kundër Korrupsionit dhe Krimit të Organizuar (SPAK) ka hapur një hetim të thelluar mbi pasurinë e Erion Veliajt, kryetarit të Bashkisë së Tiranës. Hetimi përfshin gjithashtu anëtarë të ngushtë të familjes së tij, duke u shtrirë nga bashkëshortja Ajola Xoxa, te vëllai Arbër Veliaj dhe nëna Shqiponjë Veliaj.
Prokurori i SPAK, Ols Dado, ka bërë një kërkesë zyrtare drejtuar të gjitha bankave të nivelit të dytë në Shqipëri, duke kërkuar informacion të detajuar mbi veprimet bankare dhe transaksionet financiare të Veliaj dhe familjarëve të tij, si brenda ashtu edhe jashtë vendit. Kjo kërkesë përfshin gjithashtu edhe detajet rreth kredive që mund të jenë marrë nga këto persona.
Në një zhvillim të ngjashëm, më 30 prill, Erion Veliaj u paraqit në SPAK, ku dëshmoi për rreth 8 orë lidhur me hetimet për dosjen e inceneratorëve, një çështje e cila ka ngjallur debate të ashpra politike dhe mediatiike në vend. Veliaj e cilësoi prezencën e tij në SPAK si të një “bashkëpunëtori”, duke theksuar se kishte qenë ai vetë që kishte kërkuar një takim me hetuesit.
Pas përfundimit të seancës, Veliaj foli para gazetarëve, duke i vlerësuar hetuesit si “dy kolegë hetues profesionistë dhe të disiplinuar”. Ai shtoi se kishte përfunduar një ezaurim total të çështjes së incineratorëve dhe falënderoi SPAK-un për punën e tyre, duke theksuar se ky takim e kishte bindur për rëndësinë e investimit në forcimin e institucioneve ligjzbatuese në Shqipëri.
Ky hetim nga SPAK vjen pasi drejtorët kryesorë të Bashkisë Tiranë u arrestuan në lidhje me aferën 5D.
