Autoriteti i Komunikimeve Elektronike dhe Postare (AKEP) ka hedhur për konsultim dokumentin për rezultatet e modelit të kostove të shërbimeve me shumicë të rrjeteve celulare. Dokumenti synon të vendosë tarifa me shumicë të thirrjeve që të reflektojnë kostot direkte, të matura për operatorët e komunikimeve të lëvizshme në Shqipëri.
Deri tani, për vendosjen e tarifave të terminimit të thirrjeve kombëtare AKEP është mbështetur në metodën e mesatarizimit të tarifave. Kjo është bërë në mungesë të një metodologjie të mirëfilltë për llogaritjen e kostove të tregut shqiptar.
Tarifat aktuale në Shqipëri, janë rreth 1.11 lekë/minutë për të dyja llojet thirrjeve telefonike, hyrëse dhe dalëse. Për t’i çuar këto tarifa në koston mesatare, që është edhe objektivi kryesor i AKEP, tarifat e terminimit të thirrjeve duhet të ulen me rreth 32% për thirrjet kombëtare, si dhe me 31% për ato ndërkombëtare.
AKEP konsideron se ky hendek është i rëndësishëm, shkruan Monitor, megjithatë parashikon që ulja këtyre tarifave drejt kostos të bëhet në mënyrë të përshkallëzuar, sepse në periudhën afatshkurtër, ndikimet e krizës së pandemisë mund të jenë të ndjeshme për operatorët. Mbështetur edhe në eksperiencën e vendeve të tjera europiane e ballkanike, AKEP ka propozuar që ky proces, duhet të zgjasë dy vjet, në intervalin 2022-2024.
