Historia e 18-vjeçarit shqiptar Samet Mata ka marrë shumë jehonë në Angli.
Fushatës për të ndaluar dëbimin e tij nga ishulli, i është bashkuar edhe aktori Joe Sims.
Ky i fundit është shprehur për mediat britanike, se shqiptari meriton të realizojë ëndrrat e tij.
“Do t’i lutem të gjithëve që ta ndihmojnë këtë djalosh, i cili është përballur me shumë vështirësi. Ai meriton që të realizojë ëndrrat e tij dhe të qëndrojë këtu për të vazhduar trajnim për t’u bërë marangoz”, ka thënë Sims.
Deri më tani janë mbledhur 11 mijë firma, që Samet Mata të mos largohet nga Anglia, ndërsa peticioni vijon ende.
Samet Mata në Shqipëri i nënshtrohej dhunës dhe abuzimit të tmerrshëm.
Deri në moshën 11-vjeçare ai lypte në rrugë, ndërsa kur mbushi 15 vjeç, u tërhoq në Bruksel nga babai i tij, një trafikant famëkeq në Europë.
Tre vite më parë ai arriti t’i shpëtonte kthetrave të të atit dhe e gjeti veten në një kamion në Bristol.
Pas gjashtë muajsh qëndrimi në një qendër fëmijësh, shërbimet sociale e dërguan të jetonte me John Stokes, një kujdestar lokal, i cili prej 30 vitesh mbështet fëmijët me probleme.
Mirëpo së fundmi, autoritetet angleze i kanë refuzuar të drejtën e qëndrimit dhe ai është i frikësuar, se do të përfundojë në një vend ku përveç traumave nuk do të gjejë gjë tjetër.
Pasi mori letrën ai tha për ‘Metro’: U ndjeva i stresuar kur mora letrën. Ndihem i frikësuar tani. Nuk dua të kthehem në Shqipëri. Shpresoj që Zyra e Brendshme të ndryshojë mendim. Jeta është e mirë këtu me Johnin.
Kujdestari ndërkohë pretendon se qeveria po heq vendiminm për t’i dhënë azil emigrantëve të pashoqëruar derisa të mbushin 18-vjeç.
‘Ai është i shquar në kolegj. Ai po bën një kurs zdrukthëtarie për vitin e dytë. Të gjitha rezultatet e tij janë të jashtëzakonshme. Ai mësoi gjuhën angleze shumë mirë dhe po bën gjithçka në thelb. Por gjëja kryesore është që ai është bërë pjesë e familjes’, tha Stokes për Sametin.
