Pas një jave hetimesh, është zbardhur vdekja e Branko Shkozës, 33-vjeçarit që u gjet i pajetë në një kanal në zonën e Spitallës në Durrës.
Në pranga është vënë shoku i tij, Majlind Habibi, i cili dyshohet se e ka shtyrë nga një urë pas një konflikti mes tyre, duke i shkaktuar vdekjen. Sipas Habibit, konflikti ka ndodhur pasi viktima i kishte ngacmuar gruan.
Ngjarja ka ndodhur më 2 dhjetor, ndërsa trupi i viktimës u gjet tre ditë më vonë, në 5 dhjetor, vetëm pak metra larg banesës së tij. Babai i viktimës, tregoi se autorin e dyshuar e kishte pyetur në lidhje me humbjen e djalit, por ai e mashtroi, duke thënë se nuk e dinte se ku ndodhej.
Babai theksoi se kishte kërkuar me forcat e policisë për disa ditë dhe kishte gjetur trupin e djalit afër shtëpisë. Ai gjithashtu shprehu shqetësimin për sigurinë e familjes së tij, pasi ata frikësohen nga reagimet e mundshme të familjarëve të autorit.
Në një deklaratë tjetër, babai i viktimës tha se kishte dyshuar se shoku i djalit të tij ishte përgjegjës për vdekjen pasi kishte vënë re lëvizje të dyshimta dhe sjellje të pazakonta nga ana e tij. Ai po ashtu theksoi se kishte ftuar Habibin për drekën e varrimit, por ai nuk ishte shfaqur.
