Në fjalën e tij në parlament, deputeti Erion Braçe rikujtoi ngjarjen tragjike të masakrës së Peshkëpisë, një episod dhunor që ndodhi 30 vjet më parë dhe përfshiu vrasjen e dy ushtarakëve shqiptarë. Braçe theksoi mungesën e hetimeve të duhura dhe përfshirjen e njohur të disa individëve në këtë ngjarje, duke kërkuar që drejtësia e re të trajtojë me seriozitet rastin.
Braçe detajoi: “30 vjet më parë, një organizatë e shpallur terroriste nga Greqia, MAVI, kreu një sulm të armatosur në postën e Peshkëpisë, duke lënë pas dy ushtarakë shqiptarë të vrarë dhe disa të tjerë të lënduar. Kjo çështje ka mbetur pa u hetuar në detaje, me persona të njohur që janë mbështetur edhe nga politika.”
Ai shtoi se autoritetet shqiptare të asaj kohe nuk ndërmorën veprime të mjaftueshme për të zbardhur plotësisht ngjarjen dhe nuk bashkëpunuan me autoritetet greke për hetime të mëtejshme. Braçe theksoi rëndësinë e ndërtimit të raporteve të mira fqinjësie me Greqinë, bazuar në vendosjen e drejtësisë dhe trajtimin e duhur të ngjarjeve të tilla.
“Drejtësia e re të merret seriozisht me këtë ngjarje. Nuk mundet që njerëz që janë terroristë në Greqi, të vijnë në Shqipëri dhe jo vetëm që janë brenda ligjit, por edhe dominojnë skenën politike,” përfundoi Braçe, duke theksuar nevojën për veprim dhe drejtësi në lidhje me këtë çështje të rëndë.
Lexo më shumë:
Djegia e flamurit shqiptar dhe masakra e Peshkëpisë, Berisha përgjigjet për akuzat ndaj Belerit
