Ashtu sikurse ishte paralakmëruar nga ish-Kryeministri Sali Berisha sot do të mbahet protestav para selisë së Partisë Demokratike kundër kryedemokratit Lulzim Basha. Protesta është parashikuar që të nisë sot në orën 12:00.
Policia e Shtetit blindon zonën përreth Parlamentit dhe selisë së Partisë Demokratike.
15 automjete policie kanë zbarkuar në pjesën e njohur si zona e Akademia e Shkencave, në krah të Parlamentit.
”Ballkan Web” raporton se përveç këtyre mjeteve, janë 3 autobote me ujë dhe një autoblindë i Forcave Speciale, RENEA, për t’iu paraprirë çdo situate të mundshme gjatë protestës së thirrur nga ish-kryeministri Sali Berisha para selisë së PD-së sot në orën 12:00.
Ndërkohë që duket se kjo e shtunë do të jetë një ditë normale pune për Kryetarin e Partisë Demokratike. Lulzim Basha ka thirrur një mbledhje të Kolegjit të Kryetarëve të Partisë Demokratike për të diskutuar mbi kalendarin dhe masat për organizimin e partisë. Kjo do të jetë edhe mënyra që mesa duket ka zgjedhur ta presë protestën e thirrur nga Sali Berisha.
Sipas njoftimit të bërë nga Sekretari i Përgjithshëm, pritet që më pas, brenda po të njëjtës ditë, të mblidhet edhe Kryesia e Partisë.
Kjo mbledhje e Kolegjit të Kryetarëve bëhet në vijim të vendimit të Kuvendit Kombëtar të datës 18 Dhjetor, ku u miratua Programi Organizativ i PD. Sipas këtij programi rezulton se brenda datës 15 Shkurt 2022 do duhet të përfundojnë zgjedhjet në nivel seksioni dhe grupseksioni, ndërsa brenda datës 15 mars 2022 do duhet të përfundojnë zgjedhjet në organet drejtuese të degës ku është krijuar vakancë dhe konstituimi i Kryesisë së Degëve pas procesit të organizimit.
