Detaje të reja janë bërë të ditura ditën e sotme nga dosja e grupit hetimor për vrasjen e biznesmenit Demir Backa, i cili u qëllua për vdekje brenda makinës së tij dy ditë më parë.
Policia e Fierit po kryen hetime intensive për zbardhjen e vrasjes së biznesmenit Demir Backa. Mësohet se deri tani janë shoqëruar rreth 15 persona, të cilët janë marrë në pyetje mbi ngjarjen, pasi kanë parë atë çka ka ndodhur, teksa policia deklaron se kanë qenë tre autorë të përfshirë ,por vetëm 2 kanë shtënë mbi 57-vjeçarin.
Drejt Demir Backës është qëlluar me breshëri automatiku. Tre plumba e kanë kapur 57- vjeçarin në zonën e qafës dhe të kokës. Ndërkohë që ka marrë rreth 15 plumba në kraharor.
Makina e djegur e autorëve të krimit ndodhet në mjediset e komisariatit të Fierit, aty ku do të ekzaminohet gjithçka ka mbetur prej saj.
Rezulton se mjeti i përdorur nga autorët e vrasjes së biznesmenit nuk figuron i regjistruar as në Shqipëri, as në Kosovë, por targat e tij rezultojnë të vjedhura në Kosovë.
Duket se policia ndodhet në rrugë pa krye, pasi armët e gjetura në mjet, kallashnikovi dhe pistoleta nuk mund të identifikoheshin për shkak se e kishin të fshirë numrin serial.
Për ngjarjen policia vazhdon shoqërimet e personave që mund të kenë dijeni për ngjarjen, por ende nuk ka arritur me një emër konkret si autor i dyshuar.
