Një person humbi jetën mbrëmjen e sotme në Durrës pas të shtënave me armë zjarri, ndërsa djali i tij u plagos dhe gjedet në spital. Viktima është Armando Baboçi 39 vjeç, ndërsa i plagosur në spital është i biri, I cili ka ndërruar mbiemrin, Erald Gjini 19 vjeç.
Mësohet se rreth orës 20:00 të mbrëmjes së sotme në lagjen nr. 13 jashtë ambienteve të një lokali, babë e bir janë konfliktuar me një grup personash fillimisht verbalisht më pas me sende të forta, karrige, shkop bejsbolli dhe leva dhe në fund janë përdorur armët.
Bëhet me dije se pas sherrit, babë e bir janë larguar me vrap nga vendi i ngjarjes, por personat me të cilët u përplasën i kanë ndjekur nga pas dhe njëri prej tyre i ka qëlluar me armë zjarri duke i plagosur. Babë e bir u qëlluan pas sherrit me familjen Tatozi. Për shkak të plagëve të marra, shtetasi Armando Baboçi ka ndërruar jetë në spital, ndërsa djali i tij është plagosur dhe është nën kujdesin intensive të mjekëve.
Njoftimi i Policisë:
Durrës/Informacion paraprak
Më datë 18.09.2020, rreth orës 20:00, në lagjen nr.13. Durrës, pas një konflikti të çastit me mjete të forta e më pas me armë zjarri midis disa personve, janë plagosur me armë zjarr shtetasit A.B., dhe E.Gj., të cilët ndodhen në spital nën kujdesin e mjekëve, jashtë rrezikut për jetën.
Falë reagimit të menjëhershëm të Policisë, janë shoqëruar në Drejtorinë Vendore të Policisë Durrës 6 shtetas dhe mes tyre është autori i ngjarjes, por nuk jepen të dhëna për shkak të hetimit.
Grupi hetimor ndodhet në vendngjarje dhe po punon për zbardhjen e ngjarjes.
Në lidhje me informacionin e mësipërm ku mbetën të plagosur me armë zjarri shtetasit A.B., 39 vjeç dhe E.Gj., 19 vjeç, si pasojë e plagëve të marra ka ndërruar jetë në Spitalin Rajonal Durrës shtetasi A.B.
Po në lidhje me këtë informacion është paraqitur i lënduar në Urgjencën e Spitalit Durrës, shtetasi E.T., për të cilën grupi hetimor po punon për sqarimin nëse ka lidhje me këtë ngjarje.
