Një ngjarje e rëndë tronditi mbrëmjen e djeshme kryeqytetin.
Ish-polici Santiago Malko u ekzekutuar nga persona të panjohur në zonën e Porcelanit.
E gjithë skena është parë nga kalimtarët e rastit, por edhe personat që ishin ulur në lokalet aty pranë.
“News 24” ka arritur të sigurojë disa dëshmi të qytetarëve, që kanë parë live ngjarjen.
Ata janë shprehur se ish-polici shtoi shpejtësinë, pasi pa që po ndiqej nga pas.
Sipas tyre, Malko ka humbur kontrollin e mjetit pas të shtënave, duke u përplasur me koshat e plehrave dhe më pas me murin e një biznesi, duke çarë edhe derën e tij rrethuese.
Gazetarja tregon më tej, se autorët e kanë ndjekur dhe kanë vëzhguar lëvizjet e Malkos në kryeqytet.
Ndërkohë dëshmitarët rrëfejnë se mjeti i autorëve ka qenë një furgon i bardhë dhe pas parakalimit të makinë “BMW X5” të Malkos, kanë qëlluar me breshëri kallashnikovi në drejtim të tij, pa dalë jashtë.
“E kanë survejuar dhe kanë ndjekur lëvizjet e tij në kryeqytet. Në kryqëzimin e njohur si Xhamlliku, e kanë parakaluar makinën e Santiagos, makina e autorëve ka qenë një furgon ngjyrë e bardhë sipas dëshmitarëve dhe kanë hapur zjarr duke qëlluar me breshëri. Autorët nuk kanë dalë nga makina por kanë qëlluar nga brenda saj dhe dyshohet se një pjesë e gëzhojave kanë mbetur brenda automjetit të autorëve. Sot janë ende të dukshme në vendngjarje shenjat e gomave të automjetit “BMW X5” i cili ka kaluar mbi koshat e mbeturinave dhe është përplasur me murin rrethues të një biznesi duke çarë derën kryesore të tij dhe është përplasur më pas me murin e brendshëm. Brenda automjetit të autorëve që u gjet i djegur në fshati Ferras është gjetur edhe arma e dyshuar e krimit, një kallashnikov”, u shpreh gazetarja e News24.
Dëshmitarët okularë e kanë cilësuar ngjarjen si një skenë të filmave “Far west”.
Ndërkohë në momentin e atentatit, në zonë ka pasur dhjetëra makina dhe qytetarë, të cilët janë tmerruar nga ajo që kanë parë dhe kanë vrapuar për t’i shpëtuar plumbave.
