Detaje të reja janë zbuluar në lidhje me atentatin ndaj Ardjan Çapjas, i cili ndodhi në 8 qershor.
Ekspertiza ka zbuluar, se Çapja u qëllua me snajper nga Kodra e Krastës në një largësi prej 346 metrash.
Menjëherë ai u dërgua në spital ku iu nënshtrua në ndërhyrje kirurgjikale. Çapja arriti të shpëtonte mrekullisht edhe pse në fillim gjendja e tij shëndetësore u raportua e rëndë, pasi plumbi e kapi pranë zemrës.
Pas disa orëve operacion ai doli nga rreziku për jetën.
Në ekspertizën e kërkuar nga Prokurorët e Elbasanit, thuhet gjithashtu se Ardian Çapja u qëllua nga Kodra e Krastës.
Materiali i përgatitur nga RENEA është bërë pjesë e dosjes hetimore. 55-vjeçari, mësohet se nuk ka dhënë asnjë ndihmë për policinë dhe prokurorinë për zbardhjen e ngjarjes pas daljes nga spitali.
Atentati ndodhi më 8 qershor kur Çapja ndodhej në një rrugicë jashtë banesës dhe u qëllua me një plumb në shpatull, shumë pranë zemrës.
Ai u mjekua në Spitalin e Traumës për shkak të gjendjes së rëndë. Autorët dogjën mjetin dhe armën në një zonë të pyllëzuar në periferi të Elbasanit.
Policia ka shoqëruar disa persona për ngjarjen dhe ka dyshime se atentati ka ardhur për shkak të konflikteve nga e kaluara.
Pas përmirësimit të gjendjes shëndetësore, vetë Çapja deklaroi se atij nuk i ishte bërë asnjë atentat dhe se dikush do kishte gabuar me siguri shënjestër.
Çapja u shpreh se nuk kishte asnjë dyshim për ndonjë person në veçanti.
Madje, ai kërkoi edhe daljen e menjëhershme nga ambientet e spitalit për t’u transferuar në banesën e tij.
