“Kam qenë kritikë nga njerëz që janë të përfshirë në krime apo abuzime dhe aktualisht në PD në qarkun Berat kandidojnë persona të inkriminuar”, deklaroi dje biznesmeni Astrit Veliaj, i cili u skualifikua nga votimet e anëtarëve të PD-së.
Duke folur për Bashën ai tha se nuk ndëshkon abuzimin. “Marrëdhëniet me Bashën kanë qenë edhe larg edhe afër. Sa herë shkelte parimet rrija larg, sa herë i zbatonte afrohesha. Kam qenë gjithmonë kritikë për shkeljen e parimeve nga baza dhe i kam raportuar dhe nga Basha kam marrë përgjigjen “mos u përziej me këtë punë”. Ai është perëndimor, por i mungon kuraja për të luftuar pandëshkueshmërinë”, tha Veliaj në një intervistë për A1 Report. “Një lider nuk duhet të mendojë për karrigen e tij, por akti e bën atë të madh dhe duhet mbyllur kjo histori “unë , unë dhe askush tjetër”. Ai nuk po kontrollon dot më bazën, ajo është shthurur”, tha Astrit Veliaj.
Nga ana tjetër, në reagimin e tij, kryetari degës Berat, Gazment Azizi, tha se “Procesi i votimeve në PD për konfirmimin e kandidatëve për deputet, nëpërmjet parimit “një anëtar një votë” është një pasqyrë që s’mund të zbukurojë dot një fytyrë të shëmtuar dhe të urryer! Mund të marrësh votë pro për shkaqe të ndryshme ,por votë kundër pa e merituar nuk mund të marrësh dot pse do njëri apo tjetri”.
/Gazeta Reforma/
