Dhjetëra shtete, shumica e të cilave në Evropë, kanë pezulluar përdorimin e vaksinës së kompanisë “AstraZeneca”, për shkak të efekteve anësore të mpiksjes së gjakut.
Ndërkohë që pezullimi është bërë nga shumë shtete, shteti ynë, i drejtuar nga kryeministri Edi Rama ka marr vendim komplet të kundërt. Rama ka lejuar futjen e këtyre vaksinave në Shqipëri dhe sipas planit, mendohet që me dozat e “Astrazeneca” do të vaksinohen të gjithë mësuesit dhe pedagogët në vend.
Danimarka është bërë javën e kaluar vendi i parë që ka ndaluar përdorimin e vaksinës “AstraZeneca” kundër koronavirusit, pas raporteve për mpiksje gjaku te disa njerëz. Një person, madje, ka vdekur si pasojë e trombozave të shumta, dhjetë ditë pasi është vaksinuar me dozën e parë të AstraZeneca-s. Më pas pezullimi vijoi me Francën, Italinë, Norvegjinë, Islandën, Bullgarinë, e së fundi edhe Gjermania.
Në përgjigje të këtyre njoftimeve, AstraZeneca ka thënë se ka rishikuar me kujdes të dhënat për 17 milionë njerëz që kanë marrë këtë vaksinë në Evropë. Nga ata, ka thënë AstraZeneca, 37 njerëz kanë pasur probleme me mpiksje gjaku. Sipas saj, “nuk ka prova të rrezikut në rritje” për mpiksje gjaku në ndonjë grupmoshë apo gjini.
Pavarësisht deklaratave të vetë kompanisë prodhuese, fakti që shumë shtete të fuqishme evropiane e kanë pezulluar përkohësisht si vaksinë, a duhet që dhe Shqipëria të pezullojë përkohësisht vaksinimin?
Sikurse u lajmërua, në Shqipëri ka nisur procesi i vaksinimit të mësuesve, por shumë prej tyre kanë refuzuar të marrin dozat.
Në deklaratat publike, ministrja e Shëndetësisë dhe Mbrojtjes Sociale, Ogerta Manastirliu, tha se dozat e AstraZeneca do të vijnë në Shqipëri dhe nuk do të pezullohen si shtetet e tjera. Madje ajo tha se do të vazhdojë dhe vaksinimi, pasi mësuesit që e refuzojnë është një numër i vogël.
“Vaksinimi me AstraZenecan në Shqipëri nuk do të ndalet. Ministrja e Shëndetësisë shprehet se mësuesit që refuzojnë janë në numër të vogël dhe nuk ndikojnë në proces. Nga ana tjetër Sindikata e Arsimtarëve shpreh shqetësimin për mungesën e informacionit.”, mësohet të ketë thënë Manastirliu.
Po e njëjta linjë është ndjekur dhe nga kryeministri Edi Rama. Ai e ka cilësuar një luftë tregtare duke mos i marr në konsideratë veprimet e shteteve të mëdha si Italia, Franca apo Gjermania.
Në të gjithë Shqipërinë janë 41 shkolla deri tani, ku është hapur procesi i vaksinimit. Komiteti Kombëtar i Vaksinimit dhe Komiteti i Imunizimit po vlerësojnë situatën hap pas hapi.
Deri tani janë kryer rreth 30 mijë vaksinime për personelin shëndetësor, të moshuarit dhe mësuesit në të gjithë vendin.
