Kombëtarja shqiptare barazoi pa gola kundër Serbisë në ndeshjen miqësore të zhvilluar më 7 qershor në “Arenën Kombëtare”.
Kuqezinjtë dominuan në pjesë të mirë të takimit dhe patën një mundësi të artë për të marrë fitoren, por Rey Manaj nuk arriti të shënonte nga pika e bardhë, pasi portieri Petrovic i priti penalltinë.
Në konferencën për shtyp pas ndeshjes, trajneri Sylvinho u pyet edhe për mungesën e minutave për Jasir Asanin, një nga lojtarët që ai vetë kishte afruar dhe vlerësuar më parë.
“Asani ka qenë vendimtar në rrugëtimin tonë drejt Europianit, ashtu si edhe Nedim Bajrami, me gola e paraqitje të mira. Por sot kemi më shumë konkurrencë. Nga 15-16 lojtarë që kishim dikur, sot kemi 22-23 futbollistë në nivel shumë të mirë. Kjo është diçka pozitive për ne,” tha Sylvinho.
Ai shtoi se grupi është rritur në cilësi dhe kjo sjell fleksibilitet në skemën e lojës, duke përmendur emra si Broja, Uzuni apo vetë Asani, të gjithë me karakteristika të ndryshme që i japin zgjidhje skuadrës në fazën sulmuese.
“Më pëlqen kjo larmi. Edhe kundërshtari e ka më të vështirë të kuptojë çfarë të presë nga ne. Do vijë momenti i secilit, dhe jam krenar për të gjithë djemtë që kam në dispozicion,” shtoi ai.
I pyetur për atë se cila skuadër ishte më pranë fitores, Sylvinho u përgjigj: “Ishte një ndeshje e barabartë, por ne kishim penalltinë dhe kjo na vendoste më pranë suksesit. Në fund, gjithçka mbetet e hapur për të dyja ekipet.”
