Këtë herë në “kurthin” e Propagandës së Qeverisë ka rënë edhe Policia e Shtetit, me prapaskena abuzuese për punonjësit me mision për t’i garantuar siguri qytetarëve shqiptarë.
Duke ju referuar një denoncimi të bërë në “Media Ditari”, është zbuluar një kalvar i gjatë abuzimesh për punonjësit e Policisë së Shtetit, të cilët sipas kontratës së përdorimit të makinave për shkak të kilometrave të limituara efektivët janë detyruar ta patrullojnë në këmbë. Sikur të mos mjaftonte kjo, në 2 muajt e parë të vitit, pagesa e ushqimit që duhet të kalonte bashkë me pagën, nuk ishte dhënë.
Por nuk mbaron me kaq. Kalvari i abuzimit me punonjësit e Policisë së Shtetit vazhdon. Në një tjetër denoncim të bëjë në po të njëjtën media, një efektiv pretendon se ai dhe kolegët e tij po punojnë me orare të zgjatura, nga 12 orë, ndërkohë që shefat u shënojnë nga 8 orë punë, duke mos u paguar asnjë orë shtesë.
Gjithashtu edhe në ditët e pushimit, Policët i gjen herë në protesta dhe herë në stadium. Orar i cili nuk paguhet ekstra, por përfshihet në pagën mujore. Si të mos mjaftojnë këto, edhe pagesat e dietave të premtuara nuk po jepen, pavarësisht se propaganda që u bë në fund të vitit të kaluar ishte e madhe.
E vetmja pasuri që u ka mbetur duket se është vetëm uniforma e Policisë. Ndoshta, do vijë dita kur kapelen e Policisë ta shesin për të nxjerrë muajin me bukë, pasi sipas një tenderi të pak viteve më parë të Ministrisë së Brendshme, ajo kapele vlente më shumë se 300 euro.
