Vaksinat kineze do të mbërrijnë së shpejti në Shqipëri. Qeveria shqiptare ka nënshkruar marrëveshjen me kompaninë kineze Sinovac për vaksinën Coronavac. Mësohet se 300 mijë vaksina do të vijnë në vend në fillim të muajt prill, por ende nuk është zyrtare data kur këto doza pritet të mbërrijnë.
Gjithashtu bëhet me dije se blerja e vaksinës nuk është bërë në mënyrë të drejtpërdrejtë me qeverinë e Kinës, por me anë të distributorit turk “Keymen Ilaç Sanayi ve ticaret”.
Kontrata është hartuar njëjtë si me vaksinat nga kompania Pfizer, pasi në të sanksionohet ruajtja e sekretit tregtar dhe nuk do të bëhet publike asnjë e dhënë mbi sasinë që është blerë apo çmimin me të cilin Shqipëria do e marrë vaksinën.
Kujtojmë se ditën e djeshme në vend kanë mbërritur 10 mijë dozat e para të vaksinës ruse Sputnik V me të cilat do të vazhdojë vaksinimi i të moshuarve mbi 80 vjeç. Vaksinat ishin dhuratë nga Princi i Emirateve të Bashkuara Arabe.
Më herët në Shqipëri kanë mbërritur doza të vaksinës Pfizer dhe AstraZeneca. Vaksina kineze e Sinovac do të jetë vaksina e katërt që vjen në Shqipëri. Qeveria shqiptare miratoi aktin normativ që i hap rrugë vaksinave të prodhuara në vendet e lindjes, nëse ato kanë marrë aprovimin në agjencitë e barnave të vendeve ku janë prodhuar.
