Në protestën e djeshme që nisi rreth ores 18.00 dhe përfundoi në orën 22.00, nuk munguan dhe protestuesit e maskuar.
Njëri prej tyre është Armando Gecaj, 26 vjeç, thekson “shqiptarja.com” i cili është kapur duke ushtruar dhunë pranë kryeministrisë si dhe pranë Parlamentit.
Ai njihet si militant i Partisë Demokratike, pasi në protestë ka mbajtur flamurin e Partisë Demokratike.
Shfaqej gjithmonë në rreshtin e parë të protestuesve duke mbajtur në duar edhe shashka.
Ndër të tjera ai ka ushtruar dhe forcë duke hequr gardhin metalik të vendosur para godinës së Kuvendit.
Ai tashmë është arrestuar nga Policia e Tiranës, dhe ndodhet në spitalin e Traumës në Tiranë, pasi edhe vetë ka pësuar lëndime në trup gjatë përplasjeve.
Ish-deputeti Bardh Spahia e ka vizituar në spital protestuesit dhe para ish-deputetit, protestuesi, këtë radhë i pamaskuar thotë se nuk ka qenë prezent në asnjë skenë dhune.
“Veç kam protestuar. Kam pas një zinxhir. Shi si e kam shpinën, më kanë qëlluar në shkelma, këto shenja nuk rrejnë atë se çfarë më kanë bërë mua. Të ma sjellin një kamer që kam qëlluar, nuk i kam gjuajtur kujt, kam mbajtur një zinxhir në dorë, një video t’ma sjellin mua që i kam nxjerrë policit kapsolle,” – thotë militanti i PD-së duke ju drejtuar Bardh Spahisë.
