Antonina Favorskaya, gazetarja që filmoi videon e fundit të Alexei Navalny para vdekjes së tij, është arrestuar nga autoritetet ruse, raporton The Guardian. Ajo ka mbuluar gjyqet e Navalny për disa vite dhe ka punuar për organizatën e lirisë së medias, Reporterët pa Kufij.
Autoritetet e akuzojnë Favorskayan për postime në platformat e organizatës ekstremiste “Fondacioni i Navalnyt Kundër Korrupsionit”, sipas njoftimit të grupit rus të të drejtave të njeriut, OVD-Info. Megjithatë, zëdhënësja e Navalny, Kira Yarmysh, theksoi se Favorskaya nuk ka publikuar asgjë në platformat e Fondacionit, duke sugjeruar që arrestimi i saj është bërë për shkak të punës së saj si gazetare.
Favorskaya u arrestua fillimisht më 17 mars, pasi vendosi lule në varrin e Navalnyt dhe u akuzua për mosbindje ndaj policisë. Pas 10 ditësh në burg, ajo u akuzua përsëri. Gjithashtu, Favorskaya është një nga gazetaret ruse të cilët janë shënjestruar nga qeveria e vendit si pjesë e një fushate kundër disidencës në Rusi.
Yarmysh tregoi për abuzimet që Favorskaya ka pësuar në paraburgim, duke përfshirë dhunën fizike dhe talljen nga autoritetet. Këto arrestime dhe trajtimet e rënda vijnë në kontekstin e klasifikimit të Fondacionit të Navalnyt si organizatë ekstremiste nga shteti rus, duke i vënë në rrezik ata që janë të lidhur me të për ndjekje ligjore.
