Policia e Shtetit ka arrestuar 27-vjeçarin Elvis Ndreca, i shpallur në kërkim në kuadër të operacionit “Revanshi”.
I riu u arrestua mbrëmjen e djeshme dhe akuzohet nga SPAK për “Sigurimin e kushteve për të kryer vrasje” ndaj Durim Bamit.
Ndreca u përfshi në përgjimet e SKY ECC dhe është kushëriri i deputetit të PS, Eduard Ndreca.
Gjykata e Posaçme i kishte caktuar masën e sigurisë “Arrest në burg” për veprat penale “Sigurimi i kushteve dhe mjeteve për të kryer vrasje”, “Pjesëmarrja në grup të strukturuar kriminal” dhe “Kryerja e veprave penale nga organizata kriminale”.
Pas arrestimit, Ndreca iu dorëzua Policisë së Lezhës për procedura të mëtejshme.
Njoftimi i policise
Finalizohet operacioni policor i koduar “Wanted”.
Kapet një 28-vjeçar i shpallur në kërkim, i akuzuar nga SPAK, për sigurim të kushteve dhe mjeteve materiale për të kryer vrasje, kryer në kuadër të grupit të strukturuar kriminal.
Si rezultat i kontrolleve të kryera bazuar në informacionet e siguruara nga inteligjenca policore, për vendndodhjen e një shtetasi në kërkim, Seksioni për Hetimin e Krimeve të Rënda, në bashkëpunim me Sektorin e Forcës së Posacme për Operacionet Speciale dhe Kërkimin, organizoi dhe finalizoi operacionin policor të koduar “Wanted”, gjatë të cilit u lokalizua dhe u kap shtetasi:
E. N., 28 vjeç, banues në Lezhë.
Për këtë shtetas, Gjykata e Posaçme e Shkallës së Parë për Korrupsionin dhe Krimin e Organizuar Tiranë ka caktuar masa e sigurisë “Arrest në burg”, për veprat penale “Sigurimi i kushteve dhe mjeteve materiale për të kryer vrasje”, kryer në kuadër të grupit të strukturuar kriminal, “Pjesëmarrja në grup të strukturuar kriminal” dhe “Kryerja e veprave penale nga organizata kriminale dhr grupi i strukturuar kriminal.”
Shtetasi E. N. iu dorëzua Drejtorisë Vendore të Policisë Lezhë, për veprime të mëtejshme procedurale.
