Arrestimi i një nëne lehonë në Shkodër është bërë temë diskutimi edhe në seancën e sotme plenare. Depuetja e PD-së, Albana Vokshi u shpreh se kjo është një shkelje e hapur e Kodit Penal. Ka qenë deputetja Albana Vokshi e cila ka reaguar me akuza ndaj mazhorancës, pasi është shprehur çështja për dhunën në familje duhet të kishte marrë vëmendjen kryesore në Kuvend, kjo edhe për shkak të arrestimit të nënës lehonë në Shkodër. Vokshi ka thënë se ligji që iu është paraqitur deputetëve nuk flet për asnjë masë, ndërsa nuk i ka kursyer kritikat ndaj kryeministrit Edi Rama duke e quajtur këtë të fundit, të dhunshëm.
“Ju nuk mund të kaloni në procedurë ngjarjen për burgosjen e nënës lehonë. Për çfarë informacionesh keni nevojë ju. Ua them unë, ajo nënë lehonë është burgosur dhe ka lënë fëmijën 7-ditësh. Ajo e ka lënë fëmijen me dy gjyshër që nuk kujdesen dot. Një 11-vjeçare ka lënë shkollën që të kujdesej për këtë fëmijë. Spiropali duhej të ishte e para që të thoshte se duhej që të bënim debat për këtë çështje”, është shprehur Vokshi.
Kujtojmë që Diana Bahçja u arrestua nga policia e Shkodrës duke e shkëputur nga djali i saj vetëm 8 ditësh pasi gjykata e shkallës së parë në Tiranë i ka vendosur një gjobë në vitin 2020 prej 2 milionë e 500 mijë lekë të vjetër duke ia konvertuar një javë më parë, pra pas tre vitesh me burg një muaj e 20 ditë.
