Gjatë ditës së sotme, ish gjyqtari Alaudin Malaj është shoqëruar nga forcat e policisë në zonën e Liqenit Artificial Tiranë pranë një parkimi privat.
Mësohet se Malaj është konfliktuar me djalin e tij në lidhje me pronësinë e një makine, ndërsa gjatë shoqërimit ka bërë edhe rezistencë ndaj forcave të policisë.
Ish-gjyqtari ka ofenduar dhe sharë efektivët e policisë disa herë, ndërkohë që ata janë treguar të vetëpërmbajtur dhe e kanë shoqëruar në ambientet e komisariatit.
Alaudin Malaj është cilësuar si ish-gjyqtari më i pasur në Shqipëri, ndërkohë që që në vitin 2015 ILDKPI e ka kallëzuar për fshehje dhe pastrim parash, me një vlerë prej 1.7 milionë euro.
Në gusht të këtij viti Gjykata e Tiranës ka lëshuar urdhër mbrojtje për bashkëshorten e tij, duke i kërkuar ish-gjyqtarit që t’i qëndrojë larg.
Forcat e policisë kanë arrestuar Alaudin Malajn, për arsye se është konfliktuar me djalin e tij për pronësinë e një makine. Raportohet se edhe ish-bashkëshortja e ish-gjyqtarit ka pasur urdhër mbrojtjeje ndaj tij, pasi kanë pasur konflikt të vazhdueshëm me njëri-tjetrin.
Kush është gjyqtari Alaudin Malaj:
Alaudin Malaj është një emër i njohur për drejtësinë shqiptare.
Malaj është me një karrierë prej gati tre dekadash i cili dha dorëheqjen nga statusi i magjistratit, duke shmangur përballjen me vettingun. Ai disponon një pasuri të deklaruar prej 1.7 milionë euro, për të cilën u hetua dhe doli i pafajshëm nga Prokuroria.
Ai është paditur në shtator të 2015 nga ILDKPKI se kishte krijuar një skemë kompanish në emër të familjarëve të tij, për të mbuluar burimin e paqartë të pasurimit të tij të shpejtë.
Malaj është cilësuar gjithashtu më parë, si ish-gjyqtari më i pasur në Shqipëri.
Në vitin 2003 Malaj kishte 60 mijë euro pasuri. 11 vjet më vonë, familja e ish kryetarit të Gjykatës së Apelit llogaritet të ketë 1.7 milionë euro pasuri, e shpërndarë në pasuri të patundshme dhe kompani biznesi.
Duke u bazuar tek deklaratat e tij të pasurisë, ILDKP ka arritur në përfundimin se gjyqtari dhe bashkëshortja e tij kanë përfituar vit pas viti para dhe aksione biznesi nga prindërit, deklarata që konsiderohen të rreme nga kallëzuesi.
Rrethi i ngushtë familjar i ish gjyqtarit Alaudin Malaj zotëron katër kompani biznesi; Algan sh.p.k-kompani ndërtimi e themeluar në vitin 1998, Lili sh.p.k për tregtinë e ujit e vitit 2002, Rigels sh.p.k-kompani ndërtimi e themeluar në të njëjtin vit dhe Medbrand KS-kompania më e re e themeluar në tetor të vitit 2014 në Prishtinë.
Në kallëzimin për ish gjyqtarin Alaudin Malaj, ILDKP dyshon se kompanitë në emër të familjarëve janë përdorur për të shtuar fiktivisht të ardhurat e tij për krijim asetesh, përmes transferimit të kuotave apo bashkimit të llogarive personale me ato të kompanisë./Gazetareforma.com/
