Pas arrestimit të ish-dputetit Allqi Bllako për aferën e inceneratorëve, u krijua mundësia që mandatin ta merrte kandidati pasues në listat e votimit.
Tashmë Pandeli Majko ka pranuar mandatin e deputetit, të krijuar si vakancë pas arrestimit të Allqi Bllakos. Majko ditën e sotme ka depozituar formularin e dekriminalizimit në KQZ, e cila pritet ta marrë në shqyrtim këtë kërkesë.
Në zgjedhjet e 25 Prillit të viit të kaluar, Majko ishte i renditur i 19-ti në listën e PS në kryeqytet, por nuk e fitoi mandatin e deputetit, duke mos arritur të “thyente” listën. Majko ka përfituar nga mandati i lënë në mes nga Bllako pasi ka siguruar më shumë vota në krahasim me kandidatët e tjerë në listë. Tashmë pritet që KQZ të japë miratimin dhe të lejojë ish-Ministrin për Diasporën të japë kontributin e tij në Kuvend.
Kujtojmë që neni 164 i Kodit Zgjedhor, përcakton se mandati i ndërprerë i deputetit i kalon kandidatit vijues të listës së të njëjtës parti politike në zonën zgjedhore përkatëse, përveçse kur plotësimi i vakancës me kandidatin e radhës ul përfaqësimin e gjinisë së nënpërfaqësuar. Referuar rezultateve të votave në zgjedhjet parlamentare të 25 prillit, janë dy emra që pasojnë rezultatin e Alqi Bllakos. Konkretisht Pandeli Majko me 8780 vota, i renditur në vendin e 19 – të, për tu ndjekur nga Dallëndyshe Bici e listuar në numrin 21 me 4977 vota në total.
