Ish-kryebashkiaku i Lezhës, Fran Frrokaj, është arratisur pas vendimit të Apelit të GJKKO për dënimin e tij me 2 vite e 8 muaj burg.
Pas nxjerrjes së urdhrit për ekzekutimin e dënimit, ai nuk u gjet në banesën e tij. Sipas informacionit nga Prokuroria e Posaçme, Frrokaj ndodhet ende në Shqipëri dhe kërkimet për kapjen e tij janë në vazhdim.
Frrokaj u dënua për shpërdorim detyre dhe tjetërsim pronash në zonën e Ranës së Hedhun, ku u konfirmua se ai dhe disa punonjës të administratës kishin favorizuar regjistrimin e pasurive për disa persona.
Në këtë çështje, një sipërfaqe toke prej 66 mijë metrash katrorë u konfiskua dhe kaloi për llogari të shtetit. Hetimet për këtë ngjarje nisën në vitin 2019, dhe tashmë Frrokaj do të vuajë dënimin e ri pas dënimit të dhënë nga Apeli.
