Presidenti i Federatës Shqiptare të Futbollit, Armand Duka, ka reaguar pas ndeshjes Shqipëri–Serbi, duke e cilësuar sfidën si të bukur dhe me potencial për fitore nga ana e kuqezinjve.
Në një postim në rrjetet sociale, Duka thekson se pavarësisht mungesës së golave, skuadra tregoi autoritet dhe vetëbesim në fushë.
“Ishte një ndeshje ku i kishim të gjitha mundësitë për të marrë tri pikët, të cilat do të kishin qenë plotësisht të merituara për ne,” shkruan Duka, duke shtuar se futbolli nuk është gjithmonë i drejtë në raportin mes lojës dhe rezultatit.
Ai shpreh krenarinë për paraqitjen e skuadrës, duke nënvizuar se shpesh herë përkushtimi në fushë nuk përkthehet në rezultat. Sidoqoftë, qëndrimi i tij është i qartë: Shqipëria po rritet dhe po luan me personalitet në çdo sfidë.
