Pas vrasjes së 25-vjeçarit Klodian Rasha nga efektivi i policisë, Nevaldo Hajdaraj, arma e gjetur rreth 200 metra larg vendit të krimit mbetet ende një mister për prokurorinë.
Deri më tani ekspertiza nuk ka nxjerrë asnjë rezultat konkret, pasi arma e gjetur ka qëndruar për një kohë të gjatë në një pellg me ujë, duke bërë që shenjat e gishtave të mos identifikohen.
Ndërkohë prokuroria po heton nëse arma i përkiste viktimës, apo është hedhur nga ndonjë person tjetër pas ngjarjes.
Zbardhja e detajeve për armën bëhet edhe më e vështirë, pasi në vendin ku ajo është gjetur nuk ka as kamera sigurie.
Sipas informacioneve nga prokuroria, arma tip “Zoraki” do të dërgohet për një ekspertizë në një laborator jashtë vendit.
Ndërkohë pritet që ekspertiza në një laborator më të sofistikuar të zbulojë ndonjë shenjë të personit që e ka pasur këtë armë.
Pas përfundimit të proceseve të hetimit, prokuroria ka bërë me dije se do të ashpërsojë akuzën ndaj efektivit të policisë Nevaldo Hajdaraj./Gazetareforma.com/
