GJKKO ka lënë në fuqi vendimin për sekuestrimin e një apartamenti në zonën e Kodrës së Diellit, që dyshohet se i përket kryebashkiakut të Tiranës, Erion Veliaj dhe bashkëshortes së tij, Ajola Xoxës.
Gjykatë rrëzoi ankimimin e kompanisë “AgiKons” sh.p.k., e cila kundërshtonte masën e sekuestros mbi këtë pronë të paluajtshme, vendosur më parë në maj.
Po ashtu, gjatë ditës së sotme në GJKKO, Prokuroria e Posaçme kundër Korrupsionit po prezanton raportin dy-mujor të hetimeve ndaj kryebashkiakut Veliaj.
Prezantimi i këtij raporti ishte parashikuar të zhvillohej më 13 qershor, por u shty për shkak të mungesës së biznesmenit Elman Abule, i cili ndodhet nën masën “arrest shtëpie”.
Në seancën e sotme, Veliaj mungoi dhe përfaqësohej nga avokati i tij, ndërsa biznesmeni Abule mori pjesë.
Në 22 maj 2025, me kërkesë të SPAK dhe vendim të GJKKO-së, u sekuestrua edhe një apartament në zonën e Selitës, së bashku me një shtesë të saj.
Këto pasuri janë regjistruar në Administratën e Shërbimeve të Hipotekave në emër të subjektit “A.K. Shpk.”, ndërsa SPAK dyshon se Erion Veliaj dhe Ajola Xoxa kanë interesa faktike mbi to.
Kryebashkiaku Veliaj përballet me 12 akuza që lidhen me 4 vepra penale të rënda, përfshirë: “korrupsion aktiv dhe pasiv i të zgjedhurve vendorë”, “pastrim i produkteve të veprës penale”, “futje e sendeve të ndaluara në qelitë e paraburgimit” dhe “refuzim ose deklarim i rremë i pasurive e interesave private nga persona me detyrim ligjor për deklarim”.
Veliaj u arrestua më 10 shkurt në ambientet e bashkisë së Tiranës, në kuadër të hetimeve për korrupsion dhe fshehje pasurie, ndërsa bashkëshortja e tij, Ajola Xoxa, është në masën e “detyrimit për paraqitje”.
Sipas SPAK, Veliaj së bashku me persona të tjerë, përfshirë bashkëshorten, dyshohet se kanë krijuar një skemë të strukturuar për përfitime të parregullta, duke shpërdoruar fondet publike të Bashkisë së Tiranës.
Kjo skemë dyshohet të ketë shërbyer për pasurim personal dhe familjar përmes veprimeve të fshehta dhe të jashtëligjshme.
