Ditën e sotme, edhe në vendin tonë, ashtu si në shumë vende të tjera, ka nisur lehtësimi i një sërë masash parandaluese, duke shkuar kështu gradualisht drejt hapjes.
Mbrëmjen e sotme ministrja e Shëndetësisë Ogerta Manastirliu ka folur rreth efektshmërisë së kësaj hapjeje, duke u shprehur se epidemia akoma nuk ka kaluar dhe në këto momente kërkohet të jemi më shumë të vëmendshëm.
“Hapja ishte e domosdoshme. Fatmirësisht kurba është e ulët dhe e sheshtë. Ka që nga java tjetër, weekendi dhe kjo fillim jave që numri i rasteve të reja është i ulët. Por me hapjen kërkohet më shumë vëmendje, sidomos nga stafi mjekësor. Me hapjen kërkohet më shumë vigjilencë. Qytetarët duhet të respektojnë masat e distancimit fizik”- tha Manastirliu.
Në një lidhje me Skype për ‘Open’, ministrja Manastirliu tha në datën 11 maj do dalin rezultatet e para se si ka ndikuar hapja.
‘Ne po ndjekim një strategji 2 javore për hapjen. Më datë 11 maj do dalin rezultatet e para se si ka ndikuar hapja graduale. Pas publikimit me datë 11 maj do të shohim kurbën gjatë hapjes. Kjo do na shërbejë për të vazhduar me lehtësimin e masave të tjera’- tha Manastriliu.
E pyetur rreth planit për kthimin e një godine në autostradën Tiranë-Durrës në një spital Covid, ministrja tregoi se ky plan ekziston, por tregoi se po punohet për kthimin e ish-Kirurgjisë në QSUT në ambiente të posaçme për pacientët e infektuar sepse rreziku ende ekziston, teksa ekseprtët parashikojnë kthimin e virusit në vjeshtë.
