Universitetet nuk do të hapen më 11 tetor siç ishte parashikuar, por një datë të mëvonshme.
Sipas noa.al, shkak për të shtyrë datën e hapjes është bërë diversion ii shkaktuar nga universitetet publike, disa prej të cilave e kanë pranuar urdhrin e ministres së Shëndetësisë që vaksina të jetë me detyrim, ndërkohë që të tjerë e konsiderojnë të paligjshme dhe antikushtetuese.
Noa.al shkruan se është menduar që hapja e universiteteve të shtyhet me të paktën dy javë. Si datë e re për rikthimin e studentëve në auditore është menduar 25 tetori, duke shpresuar që deri atëherë të jenë vaksinuar sa më shumë studentë e pedagogë.
Kujtojmë që Ministria e Shëndetësisë e bëri të detyrueshëm vaksinimin për studentët e arsimtarët, me synimin për t’u rikthyer në auditore për këtë vit akademik. Studentët duhet të dorëzojnë certifikatën e vaksinimit në fakultetet përkatëse, në mënyrë që të ndjekin normalisht mësimin.
Ndërkohë, rektori i Universitetit Bujqësor, Fatbardh Sallaku është shprehur se mund të shtyhet nisja e vitit akademik, në mënyrë që të vijohet me vaksinimin e studentëve.
Për Euroneës, Sallaku tha se asnjë student nuk do të lejohet të futet në auditor dhe se pedagogu do të ketë listën e studentëve që mund të marrin pjesë fizikisht në mësim.
