Ditën e sotme presidenti i vendit, Bajram Begaj, ka reaguar lidhur me aneksimin e katër rajoneve të Ukrainës nga Rusia.
Në një reagim në Twitter, Begaj shprehet se dënon me forcë shkeljen e përsëritur të integritetit territorial të Ukrainës nga ana e Rusisë.
“Reagimi i Presidentit te Republikes Sh.T.Z Bajram Begaj, lidhur me aneksimin e territoreve ukrainase nga Rusia.
Dënoj me forcë shkeljen e përsëritur të integritetit territorial të Ukrainës nga ana e Rusisë. Sfida e hapur dhe flagrante e Rusisë ndaj ligjeve dhe komunitetit ndërkombëtar është lajm i keq për paqen dhe rendin botëror”, shkruan Presidenti.
Kujtojmë se sot Presidenti Vladimir Putin ka shpallur zyrtarisht aneksimin e katër rajoneve të pushtuara nga Rusia – Donetsk, Kherson, Luhansk dhe Zaporizhzhia – gjatë një ceremonie që, sipas Moskës, do të shohë rajonet ukrainase të bëhen pjesë e Federatës Ruse.
“Unë urdhëroj njohjen e sovranitetit dhe pavarësisë shtetërore” të rajoneve të Zaporizhzhia dhe Kherson, të vendosura në Ukrainën jugore, tha Putin në dekretet.
Të katër territoret krijojnë një korridor tokësor midis Rusisë dhe gadishullit të Krimesë, i cili u aneksua ilegalisht nga Moska në vitin 2014 në një proces të ngjashëm.
Të ashtuquajturat referendume u mbajtën me nxitim ditët e fundit në mes të një kundërofensive efektive ukrainase që ka bërë që forcat ruse të shtyhen në lindje.
