Ambasadorja e SHBA-ve në Tiranë Yuri Kim ka ritheksuar dhe njëherë mesazhin e sekretarit amerikan të Shtetit për Evropën dhe Euroazinë, njëherësh i dërguari për Ballkanin Perëndimor, Gabriel Escobar.
Ambasadorja Kim publikon në “Twitter” mesazhin e tij, duke shkëputur deklaratën se angazhimi i SHBA-së për Ballkanin Perëndimor mbetet i fortë dhe se SHBA mbështet hapjen e neogociatave për Shqipërinë dhe Maqedoninë e Veriut përpara fundit të vitit, e gjithashtu nismën “Ballkani i Hapur” dhe nisma të tjera që promovojnë integrimin rajonal për të 6 vendet.
“Angazhimi i SHBA-së për Ballkanin Perëndimor mbetet i fortë, duke përfshirë mbështetjen për hapjen e negociatave europiane për Shqipërinë dhe Maqedoninë e Veriut përpara fundit të vitit 2021. SHBA gjithashtu mbështet Open Balkans (i cili duhet të jetë i hapur për të 6 BP) dhe nisma të tjera që promovojnë integrimin rajonal Shikoni dëshminë e DAS Escobar👇”, shkruan ambasadorja amerikane.
Kjo është hera e parë që ambasadorja shprehet për nismën, ndërkohë që Bashkimi Europian ka folur qartë se e gjitha është në kundërshtim me Procesin e Berlinit. Deri më tani, në “Open Ballkan” janë përfshirë vetëm Shqipëria, Maqedonia e Veriut dhe Serbia. Ndërsa mungon Kosova, Mali i Zi dhe Bosnje-Hezergovina.
Punimet e samitit “Ballkani i Hapur” kanë nisur më 29 korrik dhe u finalizuan me nënshkrimin e dy memorandumeve dhe një marrëveshje ndërshtetërore që kanë për qëllim lehtësimin e lëvizjes së njerëzve dhe thjeshtimin e formaliteteve lidhur me importin, eksportin dhe lëvizjen mallrave, bashkëpunimin mes doganave dhe autoriteteve të tjera kompetente të Serbisë, Maqedonisë së Veriut dhe Shqipërisë.
