Floreta Faber, ambasadorja shqiptare në Shtetet e Bashkuara ka treguar disa detaje nga ceremonia presidenciale si dhe ka ritheksuar angazhimin amerikane në rajon.Zonja Faber nuk ka nguruar as të shpjegojë se një pjesë e kabinetit Biden përbëhet nga diplomatë dhe politikanë që e njohin Shqipërinë dhe rajonin e Ballkanit Perëndimor.
“Kam parë shumë interes të jashtëzakonshëm, komente nga më të ndryshmet në raport se me çfarë do ndryshojë. Dhe nga njëra anë do isha shumë kurioze të shihja komente të natyrës tjetër nëse ekzistojnë, por nuk ka asnjë indikacion që mund të ketë një ndryshim të politikës amerikane në ndryshim me Shqipërinë dhe rajonin. Ky është një politikë që është gjithmonë mbështetëse, aleate ndaj nesh në forcim të partneritet strategjik, paqes dhe sigurisë.
Gjatë gjithë këtyre viteve, rreth tre dekadave të fundit kemi parë një mbështetje të vazhdueshme të SHBA në të gjitha proceset e transformimit dhe demokratizimit të procesit të ekonomisë së tregut. Kjo marrëdhënie është intensifikuar edhe më tej kur Shqipëria si anëtare e NATO ka dhënë kontributin e vet përkrah SHBA-ve.
Një pjesë e madhe e personave në administratën e re janë persona që jo vetëm kanë punuar, por edhe e njohin mirë Shqipërinë. Kjo duke filluar nga presidenti Biden, por edhe një pjesë e mirë e administratës që ai ka emëruar në Departamentin e Shtetit lidhjet janë shumë të forta me Shqipërinë dhe do doja të siguroja këdo që mendon ndryshe se padiskutim bashkëpunimi do jetë i fuqishëm dhe kjo marrëdhënie do zhvillohet gjithmonë e më tej.” – u shpreh ambasadorja shqiptare në Amerikë.
