Situata e rënduar politike në vendin tonë ka bërë që shumë organizma ndërkombëtar të shfaqin shqetësimin e tyre.
Edhe një herë tjetër Bashkimi Evropian përmes ambasadorit të BE në vendin tonë, Luigi Soreca, ka bërë thirrje për dialog në mënyrë që situata mes dy kampeve kryesore politike në vend, pra mazhorancës dhe opozitës të zgjidhet me sukses në të mirë të vendit.
Soreca në një prononcim për mediat ka thënë se dialogu mes qeverisë dhe opozitës është i domosdoshëm, pavarësisht se mazhoranca sipas tij ka fuqinë që të miratojë e vetme reformën zgjedhore. Këtë thënie ambasadori e ka mbëtetur në faktin se sipas tij nuk kërkohet ndryshim në legjislativ.
“Kur takuam qeverinë e ftuam atë të bisedonte me opozitën në lidhje me reformën zgjedhore. E ftuam qeverinë të krijojë këtë dialog dhe të merren masa në ato fusha që janë në atë kompetencë të tyre, për të parë që nuk kishte nevojë për ndryshime legjislative.
Kjo do të thotë që reforma zgjedhore mund të kryhet edhe pa ndryshimet legjislative me anën e disa hapave nga ana e qeverisë. E kemi ftuar qeverinë të ndërmarrë këto hapa në atë fushë që ka të bëjë me shit-blerjen e votave.
Ka disa gjëra që mund të bëhen nga qeveria dhe këto janë gjërat që opozita ka kërkuar. Kjo iniciativë ka të bëjë me rekomandimet e OSBE-ODIHR, që disa mund të kërkojnë ndryshime legjislative, por disa të tjera mund të bëhen nga qeveria. Ne vazhdojmë të bëjmë thirrje për dialog në çdo takim”, tha Soreca.
Megjithatë ai ka bindjen se ekziston një rrugë kompromisi, thjesht opozita dhe mazhoranca duhet ta gjejnë atë.
“Tani ka ardhur koha për kompromis, qeveria dhe opozita të takohen në mesin e urës. Unë besoj që ura ekziston thjesht duhet të gjendet”
