Besimtarët myslimanë kremtojnë sot festën e shenjtë të Fitër Bajramit, ndëra në orët e para të mëngjesit është bërë edhe falja e namazit në sheshin Skënderbej. Nuk ka munguar as urimi i ambasadës Amerikane dhe asaj të BE për besimtarët myslimanë në këtë ditë të shenjtë, ndërsa urojnë begati e lumturi.
Në një postim në Facebook, Ambasada Amerikane uron që ky vit të sjellë shëndet të mirë dhe gëzim në familjet e të gjithëve, ndërsa e gjithë bota përballet e bashkuar me pandeminë.
“Në emër të Ambasadës së Shteteve të Bashkuara, dërgojmë urimet më të mira të gjithë atyre që festojnë sot Fiter Bajramin. Kjo festë shënon kulmin e Ramazanit, një muaj në të cilin shumë përjetojnë domethënie, perceptim dhe frymëzim nëpërmjet agjërimit, lutjes dhe bamirësisë. Ndërsa e gjithë bota është bashkuar në përballjen me sfidën e COVID-19, ne shpresojmë dhe urojmë që ky vit të sjellë shëndet të mirë dhe gëzim në familjet e të gjithëve! Gëzuar Bajramin!”, thuhet në mesazhin e ambasadës amerikane.
Por ashtu edhe Ambasada e Bashkimit Europian në Shqipëri uron që sakrificat dhe përkushtimi i muajit të Ramazanit të sjellin shëndet dhe lumturi për familjet e besimtarëve.
“Gëzuar Fiter Bajramin 🕌 të gjithë besimtarëve myslimanë shqiptarë! Urojmë që sakrificat dhe përkushtimi gjatë muajit të shenjtë të Ramazanit të sjellin shëndet dhe lumturi për ju dhe familjet tuaja!”, thuhet në urimin e Ambasadës së BE.
