Ambasada Britanike në Shqipëri ka reaguar në lidhje me vendimin e Gjykatës së Posaçme Kundër Korrupsionit dhe Krimit të Organizuar, për të dënuar me dy vite burg ish-kryeprokurorin Adriatik Llalla. Në një postim në Facebook, Ambasada shkruan se ky vendim tregon se atje ku ka vullnet, reformat japin rezultat. Më tej ata thonë se kur një sektor i drejtësisë funksionon siç duhet, askush nuk është mbi ligjin.
Reagimi i plotë:
“Mirëpresim vendimin e sotëm të Gjykatës së Posaçme Kundër Korrupsionit dhe Krimit të Organizuar. Tregon se, atje ku ka vullnet, reformat japin rezultat.
Kur një sektor i drejtësisë funksionon siç duhet, askush nuk është mbi ligjin”, thuhet në reagimin e ambasadës britanike.
Ish-kryeprokurori i Përgjithshëm, Adriatik Llalla u dënua ditën e sotme me dy vite burg nga GJKKO. Mbi të rëndonin akuzat: “refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, të kryer tri herë. Ai u shpall fajtor për fajtor për veprat penale “deklarim të rremë” dhe “fshehje pasurie”.
Adriatik Llalla u zgjodh Prokuror i Përgjithshëm në vitin 2012 dhe e mbajti këtë detyrë deri në vitin 2017, kur i mbaroi mandati dhe u zëvendësua nga Prokurorja e Përgjithshme e Përkohshme, Arta Marku.
