Gjergj Kola, qytetari që u godit me shuplakë nga drejtori i Përgjithshëm i Policisë Rrugore, Altin Qato, ka rrëfyer versionin e tij të ngjarjes. Dhuna e ushtruar ndaj tij dhe kolegut me të cilin ishte në makinë, sipas Kolës, ndodhi për shkak se po i binin borisë së makinës. Në një intervistë të dhënë për “Syri”, Gjergj Kola kërkon nga institucionet që të reagojnë dhe të vënë drejtësi për këtë ngjarje.
“Unë po kthehesha, aty ishte protesta. Nuk kisha as lidhje me protestën. Po ktheheshim për Tiranë. Po i binim borisë si të gjithë të tjerët. Po i binte ai shoku im, se unë isha pasagjeri. Një moment i thotë policëve, ndaleni filan makinë. E kanë marrë kolegun tim, Edison Qerimin, atë e kanë rrahur opo nuk i kanë nxjerrë videon. Kanë tentuar ta fusin edhe në bagazh se i ka sharë. Mbasi kanë rrahur atë kanë ardhur tek unë. Ka kapur derën dhe ma ka futur në shpullë direkt, pa i bërë asgjë. T’i hapin të gjitha videot. Nëse unë e kam sharë të vijë dhe të gjuajë prapë publikisht. Ai vjen dhe të bie në shpullë sot, po nesër ta fut në plumb. Kujt ti drejtohemi ne? E pezulloi për 2 ditë dhe e ktheu në detyrë prapë. I bëj kërkesë që ta zgjidhë këtë çështje, se nuk i kam faj unë…mua më vjen turp të dal në rrugë,”-tregon ai.
Menjëherë pas kësaj ngjarjeje të rëndë, drejtori i përgjithshëm i Policisë së Shtetit, Muhamet Rrumbullaku pezulloi nga detyra Altin Qaton. Por pezullimi zgjati 3 ditë. Deri më tani, Qato nuk ka bërë asnjë deklaratë publike, as për të kërkuar falje për dhunën e ushtruar ndaj qytetarit.
