Në protestën e mbajtur sot nga Partia Demokratike në bulevardin “Zogu i Parë”, mes pjesëmarrësve u vu re edhe Alma Kaçi, e njohur për përfshirjen e saj në skandalin seksual që solli dorëheqjen e ish-kryebashkiakut të Kukësit, Safet Gjici.
Protesta vijon prej më shumë se dy orësh dhe, pak para orës 19:00, i është bashkuar edhe lideri i opozitës, Sali Berisha. Në fjalën e tij drejtuar të pranishmëve, Berisha tha:
“Të dashur demokrate dhe demokratë të pranishëm në këtë shesh dhe kudo që jeni sot, në Shqipëri dhe jashtë saj, përshëndetjet më të përzemërta nga Bashkimi Demokrat Ndërkombëtar. Mbi 87 parti politike, para të cilave paraqita sot masakrën elektorale të Toto Rinos së Ballkanit apo El Çapos së Ballkanit, Edi Rama.”
Ai deklaroi se kishte informuar partitë simotra për “shkeljet monstruoze” që, sipas tij, kanë shoqëruar procesin zgjedhor të 2025-ës. Sipas Berishës, “karrigia e Edi Ramës qëndron mbi krimin monstruoz të grabitjes dhe plaçkitjes së zgjedhjeve të qytetarëve shqiptarë”.
Më tej ai akuzoi Ramën për bashkëpunim me “bandat më të rrezikshme të Shqipërisë, rajonit dhe Europës”, si dhe për përdorimin e qindra milionë eurove për të blerë votat. Berisha përmendi si shembuj “dhuratën prej 70 milionë eurosh për votën, faljen e 200 milionë eurove të gjobave dhe mbi gjysmë miliardë euro koncesione e prokurime”.
Sipas tij, “zgjedhjet në Shqipëri ishin farsa më e shëmtuar elektorale në Europë që prej rënies së Perdës së Hekurt”, duke nënvizuar se Edi Rama nuk mund të qëndrojë në pushtet me vota të vjedhura dhe se do të përballet me “përgjigjen që meriton çdo diktator”.
