Aleksandër Llanaj, i lindur dhe banues në Vlorë, është vendosur në Regjimin e Posaçëm (“41-Bis”) për një periudhë 1-vjeçare në Institucionin e Ekzekutimit të Vendimeve Penale të sigurisë së lartë, Peqin.
Llanaj ka marrë dënime të shumta për veprat penale të kryera. Ai është dënuar më 20.01.2016, nga Gjykata e Rrethit Gjyqësor Vlorë, me 35 vite burgim për “Vrasje në rrethana të tjera cilësuese” dhe “Mbajtja pa leje dhe prodhimi i armëve, armëve shpërthyese dhe i municionit”.
Gjatë vuajtjes së këtij dënimi, Llanaj është dënuar edhe për disa vepra të tjera penale:
– Më 09.02.2017, me vendimin Nr. 79 të Gjykatës së Rrethit Gjyqësor Korçë, është dënuar me 8 muaj burgim për “Futja ose mbajtja e sendeve të ndaluara në IEVP”.
– Më 06.12.2019, me vendimin Nr. 620 të Gjykatës së Rrethit Gjyqësor Korçë, është dënuar me 2 vite burgim për “Rebelimi i të burgosurve”.
– Më 20.01.2021, me vendimin Nr. 27 të Gjykatës së Rrethit Gjyqësor Korçë, është dënuar me 2 vite burgim për “Rebelimi i të burgosurve”.
– Më 10.02.2023, me vendimin Nr. 79 të Gjykatës së Rrethit Gjyqësor Elbasan, është dënuar me 3 vite e 4 muaj burgim për “Futja ose mbajtja e sendeve të ndaluara në IEVP” dhe “Organizimi i llotarive të palejuara”.
Regjimi “41-bis” zbatohet për individë që përbëjnë rrezikshmëri të lartë shoqërore dhe kanë lidhje me organizata kriminale ose grupe të strukturuara kriminale. Ai mund të vendoset ndaj të paraburgosurve ose të dënuarve që kryejnë vepra të rënda penale që cenojnë sigurinë publike dhe rendin kushtetues.
Në vitin 2015, pas një konflikti të armatosur, Aleksandër Llanaj u arrestua si autor i dyshuar për masakrën që ndodhi më 7 prill, ku mbetën të vdekur Haki Rakipi, Alfred Velaj dhe Albi Limaj.
