Në fermën e shpendëve Rea’s në Durrës, gripi i shpendëve ka shkaktuar ngordhjen e 69 mijë pulave deri më tani. Krahas humbjeve të rënda në shpendë, janë bllokuar për asgjësim edhe 250 mijë vezë.
Përballë përhapjes së virusit, të gjitha pulat e ngordhura po eliminohen për të penguar infektimin e mëtejshëm në kapanonet e tjera të kompleksit. AKU pritet të procedojë me asgjësimin e 250 mijë vezëve të bllokuara të cilat konsiderohen të rrezikshme për konsum.
Situata në fermën Rea’s është përkeqësuar ndjeshëm që nga zbulimi i parë i rasteve të gripit të shpendëve pak ditë më parë. Në një nga pesë kapanonet e kompanisë, shenjat e para të sëmundjes çuan në vendosjen e fermës në karantinë dhe marrjen e mostrave për analiza në Institutin e Sigurisë Ushqimore dhe Veterinarisë.
Ndërkohë që priten rezultatet përfundimtare të analizave laboratorike, frika për përhapjen e virusit ka detyruar autoritetet të njoftojnë 68 subjekte të tjera të mbarështimit të shpendëve në vend për të përforcuar masat e biosigurisë në ambientet e tyre.
Përveç humbjeve direkte nga ngordhja e shpendëve dhe bllokimi i prodhimit të vezëve, ndërprerja e aktivitetit në kapanonin e prekur rrezikon të shkaktojë probleme të mëtejshme në zinxhirin e prodhimit.
Shërbimi veterinar rajonal po monitoron situatën në terren, ndërsa ekspertët paralajmërojnë se kjo ngjarje mund të ndikojë në tregun vendor të vezëve dhe të mishit të pulës në periudhën në vijim.
Mbetet ende e paqartë shkalla e plotë e përhapjes së virusit dhe koha që do të duhet për stabilizimin e situatës.
