Një alarm për bombë ka frikësuar banorët e Prishtinës mëngjesin e sotëm. Mediat kosovare kanë bërë me dije se dyshohet se është vënë një bombë pranë godinës së Agjencisë së Inteligjencës së Kosovës (AKI), e cila ndodhet në hyrje të qytetit të Prishtinë pranë kazermës ushtarake “Adem Jashari”.
Mësohet se godina e Inteligjencës është është rrethuar me shirita të verdhë të policisë dhe efektivë të shumtë kanë rrethuar mjetin e dyshuar ku mund të jetë bomba, kanë hapur dyert dhe bashkë me qentë po kontrollojnë për lëndën plasëse.
Gjithashtu mediat vendase shkruajnë se është shoqëruar një person në polici, pronari i mjetit të braktisur që ishte lënë me dyert e hapura pranë AKI-së. Në vendin e ngjarjes kanë arritur edhe zjarrfikësit.
“Sot, 09 tetor 2020, rreth orës 06:15, Policia e Kosovës ka pranuar një informacion se në rrugën Prishtinë drejtimi i Fushë Kosovës, gjendet një person i dyshuar me një veturë. Njësitet policore kanë ndërmarrë veprimet e menjëhershme në vendin e ngjarjes, ku personin e dyshuar e kanë ndaluar dhe shoqëruar në stacionin policor. Në vendin e ngjarjes janë dalë edhe njësitet kompetente policore të cilat janë duke kryer veprimet e mëtejme policore. Rruga në drejtim të Fushë Kosovës është bllokuar, përderisa të përfundojë kryerja e vendshiqimit të vendit të ngjarjes,”– ka konfirmuar, zëdhënësi i Policisë së Kosovës, Baki Kelani./ GazetaReforma.com/
