Disa dronë misteriozë që janë parë duke fluturuar natën mbi disa zona të New Jersey-t por edhe në vende të tjera ndërmjet shteteve verilindore dhe juglindore të vendit, kanë vënë në alarm anëtarët e Kongresit në SHBA.
Senatori demokrat Richard Blumenthal kërkoi që mjetet pa pilotë “të goditen dhe të rrëzohen, nëse është e nevojshme”, ndërkohë që ende nuk është e qartë se kujt i përkasin ato.
“Duhet të bëjmë disa analiza shumë urgjente të informacioneve të inteligjencës, Këto objekte duhen eleminuar nga qielli ynë, veçanërisht nëse fluturojnë mbi aeroporte ose baza ushtarake”, thotë ai.
Po ashtu, shqetësim në rajonin e New York-ut ka ngjallur fakti që dronët po fluturojnë në të njëjtën hapësirë ajrore me linjat komerciale.
Disa persona po kërkojnë më shumë transparencë nga administrata Biden lidhur me këtë çështje.
Shtëpia e Bardhë doli me pretendimin se shumë nga këta objekte janë avionë me pilot që fluturojnë në mënyrë të ligjshme.
Zëdhënësi i Sigurisë Kombëtare i Shtëpisë së Bardhë, John Kirby, tha se nuk është zbuluar ndonjë përfshirje e një shteti tjetër.
“Ne nuk kemi asnjë provë për momentin që njoftimet për dronë të paraqesin një kërcënim për sigurinë kombëtare ose publike, ose kanë një lidhje me ndonjë vend të huaj”, shprehet Kirby.
FBI dhe Departamenti i Sigurisë Kombëtare njoftuan se ato dhe agjencitë partnere federalë, në koordinim të ngushtë me Policinë e Shtetit të New Jersey-t, janë duke verifikuar se për çfarë bëhet fjalë saktësisht.
