Një 19-vjeçar shqiptar u dhunua barbarisht në burgun e Avlonës, në Greqi, ku ndodhet pas përfshirjes së tij në vrasjen e studentes greke, Eleni Topaloudi më 28 nëntor në Rodos.
Ndërkohë që të burgosurit dhunonin Aleksandër Lukajn, të tjerë filmonin të gjithë skenën, e cila tashmë ka pushtuar median e shtetit helen.
Sipas këtyre të fundit, të burgosurit grekë kanë hyrë në qelinë e tij duke e gjakosur 19-vjeçarin, që gjatë ngjarjes së tmerrshme dëgjohet të thotë:
“Nuk e bëra unë”.
Pas dhunës, 19-vjeçari është dërguar në spitalin “Evangelismos”.
Nga hetimet e deritanishme për vrasjen e studentes greke akuzohet 19-vjecari shqiptar dhe miku i tij grek 21-vejcar, pasi Eleni nuk pranoi të shkonte në shtëpinë e këtij të fundit dhe të kryente marrëdhënie seksuale.
Gjatë sherrit e qëlluan në kokë me armë të ftohtë dhe kujtuan se humbi jetën. Ata e hodhën te shkëmbinjtë në det për t’u dukur si aksident apo vetëvrasje.
Mjekët ligjorë theksuan se viktima në fakt kishte humbur ndjenjat dhe vdekja u shkaktua nga mbytja në det.
Vajza vinte nga një familje arsimtarësh grekë, madje i ati është nënkryetar i Bashkisë së zonës.
