Kryetari i Bashkisë së Libohovës, Leonard Hida, është paraqitur këtë të hënë në Prokurorinë e Posaçme.
Hida është marrë i pandehur nga SPAK në mars të vitit 2024 për shpërdorim detyre. Sipas hetimeve, në vitin 2021, kur ai mbante detyrën e shefit të Seksionit të Krimeve në Komisariatin e Gjirokastrës, ka dështuar të ndjekë hetime për rastet e kultivimit të kanabisit në zonat e Panjës dhe Zhulat të Kolonjës.
Në dosjen hetimore thuhet se, “nga të dhënat që disponohen nga shërbimet dhe ngjarjet e fundit në njësitë administrative ‘Cepo’ dhe ‘Picar’, krijohen dyshime të arsyeshme se përveç personave të përfshirë në këtë aktivitet, janë implikuar edhe punonjës të policisë, të cilët kanë pasur detyrimin ligjor për zbulimin e aktivitetit kriminal. Ata, kundrejt shpërblimeve, kanë lejuar këtë aktivitet përmes veprimeve dhe mosveprimeve të tyre.”
Fillimisht, hetimet ndaj Hides u kryen nga Prokuroria e Gjirokastrës, por pasi ai mori detyrën e kryetarit të Bashkisë së Libohovës më 14 maj 2023, prokurori Gazmend Frëngu vendosi të kalojë dosjen te SPAK për shkak të kompetencës.
Hida fitoi mandatin e kryetarit të Bashkisë së Libohovës në zgjedhjet e 14 majit 2023, me 52.64% të votave, duke mundur kandidatin e ‘Bashkë Fitojmë’, Adil Xhelili, që mori 47.36% të votave.
